ပြင်ပလက္ခဏာ 

ဦးခေါင်းပိုင်းနှင့် ခန္ဓာကိုယ်ပိုင်း အရှည် ၁၀၀-၁၃၀ စင်တီမီတာ ရှည်သည်။ ကိုယ်ခန္ဓာကို ဖုံးအုပ်ထား သည့် အမွှေးများ၏ အောက်ခံအရောင်မှာ  နို့နှစ် ရောင် သို့မဟုတ် အဝါရောင်ဖြစ်နေလျက် အနက်ရောင်အစက်များဖြင့် ဖွဲ့စည်းထားသည်။ ကျားသစ်ကွက်အဝိုင်းများ တစ်ကိုယ်လုံးတွင် ပျံ့နှံ လျက်ရှိသည်။ အနက်စက်တစ်ခုချင်းအနေဖြင့် ပြန့်ကျဲနေမှုကို ဦးခေါင်းပိုင်း၊ ခြေထောက်ပိုင်းနှင့် ဝမ်းပိုင်းတို့တွင် တွေ့ရသည်။ နားရွက်နောက်တွင် အနက်ရောင်အမှတ်အသား အကွက်လိုက်ပေါ်နေ သည်။ အချို့အကောင်များမှာ တစ်ကိုယ်လုံး အမည်းရောင်ဖြစ်နေပြီး ကျားသစ်ကွက်များကို အရေပြားတွင် မှိန်မှိန်သာ တွေ့ရသည်။ ဤကဲ့သို့ သောအကောင်များကို “သစ်နက်” (Black panther) ဟုခေါ်သည်။ 

ဓလေ့စရိုက် 

ညထွက်လေ့ရှိသည့် သတ္တဝါများဖြစ်သည်။ အရုဏ်တက်ချိန် လှုပ်ရှားမှုများသည်။ အလွန် လျင်မြန်၍ နို့တိုက်သတ္တဝါအမျိုးမျိုးကို ဖမ်းစားနိုင်သည်။ တစ်ခါတစ်ရံ သစ်ပင်တက်လေ့ ရှိသည်။ တောဝက်၊ မျောက်၊ ငှက်အမျိုးမျိုး၊ ရှဉ့်စသည်တို့မှာ ကျားသစ်၏ အစာများဖြစ်သည်။ တစ်ကောင်ချင်းအစာရှာလေ့ရှိသည်။    

နေထိုင်ရာပတ်ဝန်းကျင်

အမြဲစိမ်းသစ်တော၊ ရွက်ကြွေတောစသည်ဖြင့် သစ်တောရှိရာအရပ်ဒေသအမျိုးမျိုးတွင် တွေ့နိုင် သကဲ့သို့ မြက်ခင်းပြင်ကျယ်အရပ်နှင့် ချုံတောများ ပြန့်ကျဲလျက်ရှိသော ဒေသများတွင်လည်း တွေ့နိုင်သည်။ မြန်မာနိုင်ငံအနှံ့ပြန့်လျက် နေထိုင်သည်။